بالعاميه الفصحى -1- "الارقام شخرت لاختيارات الفيفا"

 بالعاميه الفصحى مجموعه مقالات بالعاميه شبه للكبار فقط بلغه المشجعين والشارع وليست بلغه المحللين والا الناس اللى بتطلع فى التلفزيون دى.

 لم اجد غير "الشخر" ردا على اختيارات وترشيحات الاتحاد الدولى لكره القدم "الفيفا" لجوائز الافضل فى العالم للعام 2012 وجعله عنوانا لهذا المقال

 اولا بس لازم نوضح الفرق بين الكره الذهبيه "او فى لفظتها الفلاحى البالون دور" اللى بتتوزع دوقتى وبين الكره الذهبيه اللى كانت بتتوزع قبل 2010.

فى سنه 1956 قام رئيس تحرير مجله فرانس فوتبول الله يمسيه بالخير ويرحمه مطرح ما هو قاعد جابريل هانوت باطلاق جائزه الكره الذهبيه لاحسن لاعب فى العالم ووقتها كان بالنسبلهم العالم هو اوروبا فكانا مش بيدوها غير للاعيبه الاوروبين بس ودا حرم لعيبه زى بيليه ومارادونا منها رغم انهم كانو يستحقوا بس القوانين بتقول مينفعش وفضل كدا لغايه سنه 1995 لما قرروا تغير القانون دا وخلو الجايزه تعطى لاى لاعب مهما كانت جنسيته طالما بيلعب فى فريق اوروبى واخدها على طول سنتها جورج وايا نجم الميلان كأول لعيب مش اوروبى ياخدها وجت سنه 2007 لما عنصريه المجله الفرنسيه خلصت من عندهم فقرروا ان اى حد ممكن ياخد الجايزه دى من اى مكان فى العالم واى دورى وطبعا محدش برده من بره اوروبا اخدها ولا حياخدها وحياتك.

كل دا بقى غاظ الفيفا فهو المؤسسه الاكبر للرياضه ورغم كدا فجيائزه احسن لاعب فى العالم اللى بيديها مكنش حد بيهتم بيها اصلا ولا اى معلن ولو حتى قوطونيل كان بيقربلها فقرر الفيفا يتحرك واتفق مع المجله الفرنسيه انه من اول 2010 تدمج جائزه احسن لاعب فى العالم مع جائزه الكره الذهبيه وسموها جائزه الكره الذهبيه لاحسن لاعب فى العالم "اى والله بقى اسمها كدا" وتعطى برعايه الفيفا عشان يلم فلوس اد كدا من ورا الاعلانات والنقل بتاع الجايزه دى

نسيت اقلكم على طريق الاختيار كانت ايه ايام لما الجايزه كانت مع المجله الفرنسيه,كانو بيجيبوا 92 صحفى رياضى من امهر واشهر واشطر الصحفين اللى موجودين فى ال52 دوله بتوع الاتحاد الاوروبى يختاروا على اسس فنيه وعلميه ورياضيه وتكتيكيه وشويه حاجات كدا ملناش دعوه بيها فكانت بتطلع النتيجه فى الغالب وبتعطى الجايزه للافضل فعلا او على الاقل اكتر واحد اجتهد وعمل نتايج كبيره فى السنه بس فى الاخر بيستحقها ومكنش فى بقى دخل لاى مشاعر ولا احاسيس داخل الاختيار فكله كان بمقومات معروفه للصحفين دول.

نيجى بقى للمقومات الاختيار لجايزه احسن لاعب فى العام بتاعت الفيفا واللى هى هى نفس المقومات اللى خلوها لجايزه الكره الذهبيه لما بقت تابعه للفيفا هى كالاتى بيجيبوا كابتن كل منتخب من الدول الاعضاء بالفيفا "حوالى 202" وبيجيبوا مدربين الفرق دى واى صحفى او اعلامى ملوش فى البطيخ  حتى لو كان مذيع فى برنامج طبخ وكل واحد منهم يرشح 3 من 50 لاعيب بيختارهم بقى جهابذه الفيفا على مزاجهم وبيدوا بقى عن كل اختيار 5 نقط لاول لاعب و 3 لتانى لاعب و  نقطه للتالت وادينى بقى غباوه وتخلف وجهل ومفيش اى مقومات للاختيار على شويه مشاعر واحاسيس واللى يرشحلى صحابه واللى يرشح بطريقه حادى بادى واللى داخل يهزرلى فى ورقه الترشيح زى مدرب منتخب تايلاند الالمانى وينفريد شايفر اللى ادى صوته للاسطوره الكرويه سيرجيو بوسكيتش 

"حنعتبرها بحسن النيه انه بيهزر عشان لو مش بيهزر يبقى بيتع***" وخد من دا يا سيدى بقى الترشيح.

ويظهر والله اعلم ان الناس اللى بيرشحوا اللاعيبه الافضل معندهمش غير اشتراك قناه ESPN ولسه موصلتلهمش الجزيره الرياضيه قول سبحان الله يا مؤمن من يوم ما الجايزه بقى تابعه للفيفا والتلاته المترشحين النهائين كلهم من الدورى الاسبانى ودايما ميسى اللى بيكسب كأنه مكتوب علينا زى المركز التانى للزمالك كدا,3 سنين متتاليه من 2010 ل2012 والجايزه بتروح لميسى وهو بينافس زمايله فى الدورى الاسبانى وكأن مفيش فى الدنيا غير الدورى الاسبانى المصنف السادس فى ترتيب اقوى دوريات العالم بعد البرازيلى والارجنتينى والالمانى والانجليزى والايطالى وكأن مفيش غير برشلونه بيكسب رغم انه فى التلات سنين دول فاز مره واحده بدورى الابطال الاوروبى اقوى بطوله قاريه فى العالم ورغم كدا ميسى بيكسب وهو بيخسر فى كل البطولات اللى الفيفا بينظمها مع منتخب بلاده ورغم ان دايما اللى بينافسه بيكونوا زمايله انيستا وتشافى وهما مبدعين وكسبانين كأس العالم لكن الجايزه راحت لميسى عشان طلع بمنتخب بلاده بفضيحه ليله الدخله بعد ما المانيا عملت معاهم الصح باربعه اهداف كان ميسى ضيف شرف فى هذه المباراه والبطوله عموما ومعملش حاجه دا كان فى 2010 وفى 2011 ميسى نقدر نقول كان يستحقها مع انيستا بس طبعا عشان كل واحد بيصوت على مزاج اهله فراحت الجايزه لميسى عشان الاعلام مش بيركز على انيستا اوى ففى ناس مش عارفاه ولا فى ناس بتتفرج عليه لظروف الفقر اللى فى معظم الدول اللى بتصوت.

نيجى بقى لجايزه السنه 2012 وانزل بقى يا ابو الشوق واتفرج ميسى من اول السنه قول سبحان الله وهو بيجيب اجوال بس مش بيعمل اى حاجه غير اجوال وطبعا مش ماسك الكوره من الجول للجول وبيجبها لوحده لا دا بعد ما انيستا يطلع ديك ابوه فى النص هو وتشافى و فابرجاس ويفضوا ميسى من الرقابه ويباصيله عشان يرمى الكوره فى الجول ورغم كدا مشوفناش ميسى غير وهو بيقود برشلونه للخروج من دورى الابطال باضاعته  لضربه جزاء امام تشيلسى حدفته هو وفرقته بره البطوله فى مباراه عمل فيها انيستا كل حاجه ولكن ميسى ضيع كل اللى عمله انيستا فى الماتش دا,دا غير ان ميسى خسر الدورى الاسبانى وحصل على كأس اسبانيا فى بطوله مشاركش فى اجزاء كبيره منها لانها بطوله تافه اكييد ولكنه جاب البطوله وبعد كدا خسر السوبر الاسبانى تانى ومعملش اى ابن كلب لا فى الدورى ولا فى السوبر ولا فى دورى الابطال ومجبش غير اجوال ويا فرحتى بالاجوال وانت بره البطوله بتشوفها على التلفزيون زى زيك دا طبعا غير انه جاب هاترك مع منتخب الارجنتين فى المنتخب الاولمبى البرازيلى ودا انجازه الوحيد تقريبا مع منتخب بلاده واحقاقا للحق فال91 جول اللى جابهم ميسى هو رقم خرافى الصراحه وصعب تحقيقه من غير انيستا وتشافى.

نيجى للمرشح التانى انسيتا لعيب غلبان ويصعب على الكافر 3 سنين بيترشح للجايزه ويخسر بسبب تخلف وعته اللى بيختارو اه خسر مع ميسى الدورى الاسبانى والسوبر الاسبانى ودورى الابطال لكن صال وجال فى كل حته وحاول يلحق برشلونه من الخروج من دورى الابطال لتحركاته وتمريراته وهدفه اللى احيا بيه امل برشلونه ولكن جا زميله ميسى وخربط الدنيا وضيع برشلونه فى الماتش دا "المفروض انه اهم ماتش فى الموسم يبقى الطبيعى احسن لاعب فى العالم يتألق ويعمل حاجه".

بس انيستا بقى فارق عن ميسى بكتيير انيستتا اخد اسبانيا هيلا هوب للفوز بكأس اوروبا وعمل ماتشات خرافيه واداء اكثر من رائع وعمل اللى ميتعملش وفاز بالبطوله الاكبر فى العالم بعد كاس العالم وفاز باحسن لاعب فى البطوله وطبيعيا احسن لاعب فى اكبر بطوله يبقى احسن لاعب فى العالم ودا طبعا مش بيحصل ولا حيحصل طول ما نظام الاختيار عقيم وسخيف زى دا.

طبعا مش حتكلم على رونالدو ولا بيرلو ولا ابرا ولا ولا ولا................

دا بالنسبه للكره الذهبيه نيجى بقى لجايزه احسن مدرب واللى مترشحلها مورينهو وديل بوسكى وجوارديولا وهنا بقى لازم تقف شخيرااا و سباا فى هذا الاختيار "جوارديولا" مدرب فشل فى الحصول على اى بطوله مهمه فى النصف الاول من الموسم ولم يتم التجديد له وقاعد خالى شغل 8 شهور من السنه مضقيها على البحر استجماما فتم ترشيحه لجائزه احسن مدرب تكريما لتفخيده الرائع على شواطئ امريكا.

وطبعا واضح من الترشيح ان اللى اختار المرشحين دول مش بيتفرج غير على الدورى الاسبانى وهنا تظهر الحياديه فى افشخ صورها فالواضح ان من اختار لم يشاهد دورتموند كلوب ويوفنتوس كونتى و.و.و.و.و.و.و.و....

اما بقى فريق العام فدا بقى اللى ميتسكتش عليه!!!! بيكيه وتشابى الونسو ومارسيلو فى الفريق؟؟؟!!! ازاااى؟؟؟!!! بيكيه تقريبا جاء ترشحه على حساب كيلينى وبارزالى لاعبى اقوى دفاع فى اوروبا اليوفى وعلى حساب هاملز نجم المانى وصخره دفاعها والسبب الواضح لان بيكيه وصل للفريق دا انه صاحب شاكيرا وخلاها حامل غير كدا فبيكيه كان مصاب 6 شهور و 3 شهور راحه بين الموسم ولعب كام ماتش كان اسوء لاعيب فى فرقته وتسبب فى خسارته للكثير من النقاط,نيجى بقى لتشابى الونسو لاعيب بطييييئ كان بيعطل لعب الريال فى خط الوسط اضافه لاخطائه الكارثيه لا فوق كدا بقى داخل على حساب اندريا بيرلو نجم اليوفى واللى كان من المفترض انه يكون بينافس انيستا على الكره الذهبيه  ويايا توريه اللى كان شايل السيتى طول السنه ولحقه فى ماتشات كتيير واخده للفوز بالدورى الانجليزى.

احد المصوتين لاختيار احسن لاعب فى عام 2012

اما مارسيلو فيكفى انك تعرف انه بيلعب مكان جارث بال لتطلق لجيوبك الانفيه العنان ولا تتردد فى اخراج اى الفاظ تخدش الحياء لانها ستكون فى موضعها.

وبالنسبه لجائزه بوشكاش لافضل هدف فى العالم فى ان بوشكاش شخصيا يعذب فى قبره على اختيارات الفيفا لهذا الجائزه فيكفى ان تشاهد هدف مدافع المقاولون حماده السيد فى مرمى الداخليه لتتأكد ان الاهداف المرشحه عاديه و عشان تعرف اد ايه المأساه التى وصل اليها المسؤلين على الجايزه لترشيحهم لثلاث اهداف كالتى رأيناها ومش لازم اجيب سيره هدف ابراهيموفتش فى انجلترا او حفنه من الاهداف التى تجعلك بتريل من حلاوتهاا لكن تقول ايه غير حسب يا الله ونعم الوكيل على البهايم المسؤلين الفنيين فى الفيفا.

وطبعا ففى كل سنه بتتغير بقى مقومات الاختيار لتناسب ميسى فالسنه اللى فاتت كانت لانه جاب القاب كتيير لبرشلونه فلازم نديله الجايزه والاهداف مش مهمه زى الالقاب "رونالدو كان جايب اجوال اكتر من ميسى سنتها" واللى قبلها "سنه كأس العالم" نديها لميسى عشان هو بيلعب فى النادى كويس والجايزه ملهاش علاقه بلعب المنتخب "انيستا وتشافى لاعبى اسبانيا والفايزين بكأس العالم كانوا مرشحين ضده بعد حصولها على كأس العالم اضافه الى نفس البطولات مع نفس الفريق بتاع ميسى"بس طبعا السنه دى فميسى مأخدتش اى بطوله تتقال ورونالدو هو اللى اخد فاصبحت المقومات ان ميسى جاب اجواال كتييير اكتر من رونالدو واهم حاجه الاهداف "دلوقتى بقت مهمه فشخ للاختيار" وطبعا لان انيستا ابدع مع منتخب بلاده فالمنتخب مش مهم النادى هو الاهم فى الاختيار وخد بقى على كدا كل سنه طالما فى ميسى يبقى فى كره ذهبيه ليه عشان اللى بيرشحوا ما يفرقوش حاجه عن مشجع درجه تالته الكل بيدى للاعيب اللى بيحبه وبيشجعه حتى لو كان ادائه خراء فهو مازال يحبه وحيديلوه صوته على طريقه طويل العمر يطول عمره ويزهزه عصره .

بعد كل دا بقى وبعد ما اعظم جايزه الكره الذهبيه بتاعت فرانس فوتبول اتمرمطت وطلع ميتين ديك ابوها من يوم ما انضمت واندمج مع الفيفا مش ده الوقت ان المجله الفرنسيه تلحق العار اللى لحق بجايزتها وتحاول تغطيه باى شكل وتفرض مقومات الاختيار القديمه بتاعتها على الفيفا؟؟؟!!!!! على الاقل نشهد منافسه عادله بين افضل اللاعبين فى العالم بالاحصائات والارقام والاداء والنتيجه وليس العواطف والقرابه ونشهد منتخب عالم يمثل لاعبى العالم وليس منتخب لا يمثل حتى التشكيله المثاليه الدورى الاسبانى "التشكيله المثاليه للدورى الاسبانى الموسم الماضى لا يتواجد بها العديد من لاعبى منتخب العالم المختار!!!!".

وعلى امل التعديل فى الجائزه المقبله